Turqia dhe Koreja e Jugut nënshkruan të hënën një memorandum bashkëpunimi në sektorin e energjisë bërthamore.
Kjo ndodhi gjatë vizitës së Presidentit të Koresë së Jugut Lee Jae-Myung në Ankara dhe takimit të tij me homologun e tij turk, Recep Tayyip Erdogan.
Ministria turke e Energjisë tha se me memorandumin, të dy vendet synojnë të shkëmbejnë reciprokisht të dhëna teknike, informacione, përvoja dhe njohuri, si dhe të zbatojnë projekte të përbashkëta.
Në një postim në rrjetet sociale, ministri turk i Energjisë, Alparslan Bayraktar, tha ndër të tjera: “Me këtë marrëveshje, synojmë të bashkëpunojmë në shumë fusha, nga zhvillimi i projekteve të centraleve bërthamore deri te shkëmbimi i teknologjisë dhe njohurive, nga vlerësimi i zonave deri te financimi i projekteve dhe zhvillimi i burimeve njerëzore. Shpresoj që kjo marrëveshje, e cila do të kulmojë me bashkëpunim strategjik në fushën e energjisë bërthamore, do të jetë e dobishme për vendet tona”.
