Pas disa ditësh protestash masive në Los Anxhelos, Presidenti i Shteteve të Bashkuara, Donald Trump, ka urdhëruar dislokimin e 700 marinsave dhe 2,000 trupave shtesë të Gardës Kombëtare në qytet. Ky vendim vjen në një moment të tensionuar, pas arrestimeve të dhjetëra emigrantëve dhe reagimeve të forta nga ana e demonstruesve.
Protestuesit kanë dalë në rrugët e qytetit për katër ditë me radhë, kanë organizuar marshime, ndërsa ka pasur edhe episode dhune, ku janë djegur automjete dhe janë plaçkitur disa dyqane. Forcat e rendit kanë përdorur gaz lotsjellës dhe plumba gome për të shpërndarë turmat.
Guvernatori i Kalifornisë, Gavin Newsom, ka kritikuar ashpër këtë veprim të presidentit Trump, duke e cilësuar atë si një vendim të pamatur dhe si një mungesë respekti ndaj forcave të sigurisë. Ai ka theksuar se këto masa nuk kanë të bëjnë me sigurinë publike, por me ushqimin e egos së presidentit.
Situata në Los Anxhelos mbetet e tensionuar, ndërsa qyteti përballet me sfida serioze për të ruajtur rendin dhe qetësinë.
/vizionplus.tv
