Presidenti amerikan Donald Trump kërcënoi se nuk do të lejojë hapjen e një ure, e cila është aktualisht në ndërtim, dhe do të lidhë Kanadanë me Shtetet e Bashkuara, duke thënë se vendi i tij duhet të zotërojë “të paktën gjysmën” e infrastrukturës.
“Unë nuk do të lejoj që kjo urë të hapet derisa SHBA-të të kompensohen plotësisht për gjithçka që u kemi dhënë (Kanadasë) dhe për sa kohë Kanadaja nuk i trajton SHBA-të në mënyrë të drejtë dhe me respektin që meritojmë”, shkroi Trump në rrjetin social Truth Social.
“Do të fillojmë negociatat MENJËHERË”, shtoi ai.
“Me gjithë çfarë u kemi dhënë, duhet të jemi ndoshta pronarë të paktën të gjysmës së këtij aseti”, këmbënguli Trump.
Ura, ende në ndërtim mbi lumin Detroit, do të lidhë qytetin Detroit në shtetin e Miçiganit me qytetin kanadez Windsor, në provincën e Ontarios. Projekti ka nisur në vitin 2018 dhe kostoja totale është vlerësuar në 6.4 miliardë dollarë kanadezë (rreth 4 miliardë euro). Hapja e saj parashikohet të bëhet brenda vitit 2026.
Sipas dokumenteve të Windsor-Detroit Bridge Authority, organi që menaxhon projektin, Kanadaja ka garantuar plotësisht financimin e ndërtimit, ndërsa ura do të jetë në pronësi të përbashkët të Kanadasë dhe shtetit amerikan të Miçiganit. Ajo do të mbajë emrin e legjendës kanadeze të hokejit mbi akull, Gordie Howe.
Në të njëjtin postim, Trump kritikoi sërish Otavën për synimin e saj për të forcuar bashkëpunimin me Kinën, duke deklaruar se Pekini “do ta hajë Kanadanë të gjallë”.
Gjithashtu, ai sulmoi ish-presidentin demokrat Barack Obama, i cili kishte dhënë dritën jeshile për realizimin e projektit.
Që prej rikthimit të tij në pushtet, Donald Trump ka shtuar deklaratat armiqësore ndaj Kanadasë, përfshirë sulme tregtare dhe ekonomike. Për një periudhë, ai kishte përsëritur se fqinji verior i SHBA-së duhet të bëhej “shteti i 51-të” amerikan.
Së fundmi, Trump ka kërcënuar Kanadanë me vendosjen e tarifave doganore shtesë “100%” nëse lidhet një marrëveshje tregtare mes Kanadasë dhe Kinës, si dhe ka paralajmëruar tërheqjen e certifikimit për avionët e prodhuar nga industria kanadeze, veçanërisht kompania Bombardier.
