Presidenti i Shteteve të Bashkuara, Donald Trump, dhe presidenti rus, Vladimir Putin, pritet të zhvillojnë sot një takim historik në Alaska, i paralajmëruar prej disa javësh, me theks të veçantë në përpjekjet për t’i dhënë fund luftës në Ukrainë.
Sipas agjendës së publikuar nga Shtëpia e Bardhë, presidenti Trump do të niset nga Uashingtoni në orën 06:45 të mëngjesit sipas orës lokale (EDT) dhe do të mbërrijë në Anchorage të Alaskës. Takimi me presidentin Putin është planifikuar të nisë në orën 11:00 me kohën lokale (20:00 BST) dhe pritet të zgjasë rreth shtatë orë.
Pas përfundimit të bisedimeve, Trump do të largohet nga Alaska në orën 17:45 me orën lokale.
Në një deklaratë të dhënë një ditë më parë nga Shtëpia e Bardhë, Trump la të kuptohet se një takim i dytë me pjesëmarrjen e presidentit ukrainas Volodymyr Zelensky dhe disa liderëve evropianë mund të zhvillohet në të ardhmen. “Do të kemi një takim me presidentin Putin, presidentin Zelensky, mua dhe ndoshta do të sjellim edhe disa nga udhëheqësit evropianë. Ndoshta jo,” u shpreh ai.
Ndërkohë, Trump ka minimizuar rëndësinë e këtij takimi të parë, duke e cilësuar atë si një hap përgatitor për një samit të dytë më gjithëpërfshirës.
Lufta në Ukrainë, e nisur nga Rusia në shkurt të vitit 2022 me një sulm në shkallë të plotë, mbetet çështja kryesore në rendin e ditës. Gjatë fushatës së tij presidenciale, Trump ka premtuar vazhdimisht se do ta përfundonte shpejt këtë konflikt dhe ka shprehur bindjen se një marrëveshje paqeje mes Putinit dhe Zelenskyt është e arritshme.
I pyetur nëse do të pranonte një reduktim të pranisë së trupave të NATO-s në Evropë si pjesë e një marrëveshjeje me Rusinë, Trump u shpreh se një propozim i tillë ende nuk i është paraqitur.
/vizionplus.tv
