Gjykata e Tiranës ka caktuar masat e sigurisë për Sabah Nuzi dhe shtatë personat e tjerë të arrestuar për vendosjen e tritolit në automjetin e Oltjon Klosi, ngjarje e ndodhur më 10 mars në kryeqytet.
Sipas vendimit të gjykatës, masa “arrest në burg” u caktua për Sabah Nuzin, si dhe për Jurgen Gjonaj, Renato Balla, Eklips Leti dhe Kristjan Ahmerama. Ndërkohë, për Glentjan Kojtari dhe Dorjan Hamolli u vendos masa “arrest shtëpie”, ndërsa për Geris Molla u caktua masa “detyrim paraqitje”.
Sabah Nuzi, i cili akuzohet si porositës i atentatit nga burgu, ka mohuar përfshirjen në këtë ngjarje. Në deklaratën e tij, ai u shpreh se nuk ka lidhje me shpërthimin dhe kërkoi kujdes nga mediat dhe organet e drejtësisë, duke theksuar se akuzat mund të krijojnë hasmëri të padrejta.
“Nuk kam lidhje me ngjarjen dhe as nuk e di kush mund ta ketë bërë. U kërkoj edhe medias edhe prokurorisë të jenë të kujdesshme me deklaratat, pasi akuzohem për diçka që nuk e kam bërë dhe po na fusni në hasmëri me të tjerët edhe me familjet qe permenden.Nuk kam asnje lidhje” është shprehur ai.
Sipas hetimeve, ngjarja ka ndodhur më 10 mars, kur në automjetin e Oltjon Klosit u vendos një sasi eksplozivi që shpërtheu me telekomandë.
Hetimet tregojnë se lënda plasëse është vendosur nga Jurgen Gjonaj, ndërsa personat e tjerë kanë ndihmuar në realizimin e planit, duke siguruar informacione për vendndodhjen e mjetit, lëndën eksplozive dhe mjetet e largimit pas ngjarjes.
/vizionplus.tv
