Një telefonatë midis Benjamin Netanyahut dhe Donald Trump më 23 shkurt thuhet se ishte një moment përcaktues për situatën në Lindjen e Mesme, sipas një raporti nga Axios, duke cituar burime të njohura me bisedën.
Kryeministri izraelit i telefonoi presidentit amerikan në fillim të javës së kaluar për ta informuar se udhëheqësi suprem i Iranit, Ajatollah Ali Khamenei, do të takohej në Teheran të shtunën në mëngjes me këshilltarët e tij të lartë.
Ky informacion krijo, sipas vlerësimit izraeli, mundësinë e goditjes së të gjithëve së bashku, në një sulm të vetëm.
Raporti i Axios e përshkruan bisedën e 23 shkurtit si “telefonata që ndryshoi Lindjen e Mesme” dhe thotë se Trump urdhëroi Agjencinë Qendrore të Inteligjencës së SHBA-së (CIA) të shqyrtonte informacionin që kishte ardhur nga inteligjenca ushtarake izraelite. CIA thuhet se konfirmoi besueshmërinë e informacionit..
Deri të enjten, të njëjtën ditë që të dërguarit e Trump u takuan me negociatorët iranianë në Gjenevë, CIA kishte konfirmuar përfundimisht se të gjithë këta njerëz do të ishin së bashku dhe se mundësia duhej shfrytëzuar, tha një burim për Axios.
Pas takimit në Gjenevë, të dërguarit e presidentit amerikan e informuan atë se negociatat nuk po shkonin askund.
“Këta njerëz na kanë treguar se nuk janë të gatshëm të bëjnë një marrëveshje me të cilën ju do të jeni të kënaqur”, thuhet se i thanë Trump.
Të nesërmen, pasi përcaktoi se negociatat nuk po funksiononin dhe se informacioni mbi Khamenein ishte i besueshëm, thuhet se Trump më në fund dha urdhrin për sulmin.
Axios citon gjithashtu një zyrtar amerikan i cili pretendon se SHBA-të dhe Izraeli fillimisht e planifikuan sulmin për në fund të marsit ose në fillim të prillit, në mënyrë që administrata amerikane të kishte kohë për të ndërtuar mbështetje midis opinionit publik amerikan.
Megjithatë, sipas të njëjtit burim, Netanyahu kërkoi përshpejtimin e sulmit, duke paralajmëruar se udhëheqësit e opozitës iraniane që ishin të fshehur rrezikonin të vriteshin nga regjimi.
