Të paktën 8 persona kanë humbur jetën dhe disa të tjerë janë plagosur, pas të shtënave me armë zjarri, në Hamburg të Gjermanisë. Ngjarja ka ndodhur mbrëmjen e të enjtes, në një qendër që përdorej nga Dëshmitarët e Jehovait.
Sipas policisë, ngjarja ka vetëm një autor dhe ai besohet të këtë qenë ish-anëtar i komunitetit fetar. Mediat bëjnë me dije se, gjatë natës, është gjetur në godinë një person i vdekur, rreth moshës 40-vjeçare, i cili mund të jetë autori i krimit.
Sfondi i vrasjeve në Hamburg është ende i paqartë, ndërkohë që autoritetet kanë mbledhur prova e dëshmi, për të hedhur dritë mbi ngjarjen.
Kancelari gjerman Olaf Scholz i ka shprehur ngushëllimet familjarëve të viktimave.
Dëshmitarët e Jehovait janë pjesë e një kishe ndërkombëtare, e themeluar në Shtetet e Bashkuara në shekullin e 19-të dhe me seli në Nju York. Ajo pretendon se ka rreth 8.7 milionë anëtarë në mbarë botën.
