Situata nga Covid në Maqedoninë e Veriut/ Regjistrohen 13 humbje jete dhe 421 të infektuar

Këtë të enjte Maqedonia e Veriut regjistroi 13 viktima nga koronavirusi, 421 të infektuar dhe 395 raste të të shëruarve.

Rastet e reja pozitive rezultuan pas testimit të 4,892 mostrave, bëri të ditur Ministria e Shëndetësisë.

Numri i përgjithshëm i viktimave nga koronavirusi ka arritur tashmë në 6,888, ndërsa raste aktive mbeten 6,602. Ministri i Shëndetësisë, Venko Filipçe, tha se Maqedonia e Veriut e ka kaluar “valën e fortë” të koranavirusit dhe se për momentin nuk pritet ndonjë valë e re.

“Kjo valë ishte një valë e fortë dhe kishte një numër të madh të pacientëve të diagnostikuar dhe pacientëve që kishin nevojë për trajtim spitalor, por vetëm në qytetet ku vaksinimi ishte i ulët, ndërsa në qytetet ku ishte më i lartë, nuk kishte mbingarkesë në spitale. Tani, në të gjithë vendin vaksinimi është rritur dhe unë mendoj se nuk duhet të ketë një valë tjetër të fortë, por kjo nuk do të thotë që ne nuk duhet të jemi të kujdesshëm dhe të monitorojmë situatën”, tha Filipçe.