Shtrenjtohet transporti publik, rritet çmimi i biletave për linjat drejt Kamzës dhe Paskuqanit

Prej disa ditësh, qytetarët që përdorin linjën e transportit publik Kamëz-Tiranë dhe Tiranë-Paskuqan kanë filluar ta paguajnë 25% më shumë çmimin e biletës. Kreu i Shoqatës së Transportit Publik, Dashnor Mema, rendit arsyet pse u mor ky vendim.

“Transporti publik prej vitesh ka njohur humbje në aspektin financiar. Bashkia Tiranë, prej gati tre vitesh, ka subvencionuar sektorin, ndërkohë që bashkitë e tjera nuk e kanë bërë këtë gjë. Kishim dy mundësi, ose të mbyllnim transportin, ose të rriteshin çmimet. Ne prej kohësh u kemi kërkuar institucioneve mbështetje financiare, por ajo nuk erdhi kurrë. Operatorët, në fakt, kërkuan ndryshimin e çmimit për të gjitha linjat e transportit, por u pranua vetëm për këto dy linja, për shkak se kanë gjatësinë më të madhe rrugore që përshkojnë,” shprehet Dashnor Mema.

Në planet afatgjata pritet që edhe shërbimet e linjave të tjera të transportit publik, që operojnë në kryeqytet dhe jo vetëm, të njohin një rritje të çmimit.

“Nëse do të ketë një ndërprerje të subvencionit nga ana e Bashkisë së Tiranës për sektorin e transportit publik, normalisht do të ketë një rishikim për rritjen e çmimeve të biletave. Por për sa kohë që subvencionet do të jenë të pranishme, nuk priten ndryshime, pasi kjo është marrëveshja: ose subvencione, ose rritje të çmimit të biletave dhe aboneve,” shton zoti Mema.

Sipas të dhënave nga Bashkia Tiranë, transporti publik në kryeqytet përdoret nga rreth 200 mijë qytetarë në ditë, ku një pjesë e mirë e tyre janë pensionistë që e përfitojnë falas këtë shërbim .

/vizionplus.tv