Një 21-vjeçar nga Bjellorusia, u gjet paraditen e kësaj të diele në tragetin “Euroferry Olympia”, i cili vazhdon të digjet për të tretën ditë në afërsi të ishullit të Korfuzit, në detin Jon.
I riu u gjet në pjesën e pasme të tragetit, ndërsa ndodhet në gjendje të mirë shëndetësore. Ai është shofer i një kamioni me targa lituaneze, ndërsa kur u gjet ishte në gjendje shoku.
“A jam gjallë?” raportohet të ketë thënë 21-vjeçari në momentin që u shpëtua, ndërsa deklaroi se kishte dëgjuar edhe zëra të tjerë në traget.
Aktualisht numri i personave në kërkim është 11, mes tyre 3 grekë, ndërsa autoritetet po përpiqen të shuajnë plotësisht zjarrin .
Ngjarja ndodhi në orët e para të mëngjesit të së premtes, kur trageti me flamur italian u përfshi nga flakët. Aty gjendeshin 239 pasagjerë dhe 51 anëtarë të ekuipazhit, me shtetësi greke dhe italiane.
