Një aksident rrugor është regjistruar në lagjen nr. 10 të qytetit të Korçës, ku një këmbësore 82-vjeçare është përplasur nga një automjet.
Sipas të dhënave paraprake, e moshuara po kalonte rrugën nga njëra anë në tjetrën në momentin kur është goditur nga automjeti.
Menjëherë pas aksidentit, drejtuesi i mjetit e ka transportuar vetë të lënduarën drejt Spitalit Rajonal të Korçës.
Mjekët bëjnë me dije se 82-vjeçarja ka pësuar lëndime serioze, por ndodhet jashtë rrezikut për jetën.
Ndërkohë, policia ka shoqëruar dhe ka marrë në pyetje drejtuesin e automjetit, ndërsa po vijojnë hetimet për zbardhjen e plotë të rrethanave të aksidentit.
