Shtetet e Bashkuara kanë pezulluar, për të dytën natë radhazi, sulmet ushtarake ndaj Iranit, ndërsa administrata e presidentit Donald Trump po i jep një mundësi diplomacisë për të shmangur një përshkallëzim të mëtejshëm të konfliktit në Lindjen e Mesme.
Sipas mediave amerikane, Uashingtoni po shqyrton nëse negociatat me Teheranin mund të çojnë drejt një marrëveshjeje, ndërsa presidenti Trump ka deklaruar se Shtetet e Bashkuara mbeten të gatshme për veprim ushtarak, nëse bisedimet dështojnë.
Edhe Irani ka ndalur përkohësisht sulmet hakmarrëse ndaj bazave dhe aleatëve amerikanë në rajon, në një përpjekje për të krijuar hapësirë për dialog. Në qendër të negociatave mbetet ngushtica strategjike e Hormuzit, një nga rrugët më të rëndësishme të transportit të naftës në botë.
Ndërkohë, brenda administratës amerikane nuk mungojnë rezervat për një përshkallëzim të konfliktit. Sipas mediave, zëvendëspresidenti JD Vance dhe kryetari i Shtabit të Përbashkët të Ushtrisë, gjenerali Dan Caine, i kanë shprehur presidentit Donald Trump shqetësimin se zgjerimi i operacioneve ushtarake kundër Iranit mund ta thellojë luftën në rajon. Diskutimet u zhvilluan gjatë një takimi në Shtëpinë e Bardhë, ku presidenti amerikan po shqyrtonte opsionet për hapat e ardhshëm ndaj Teheranit.
Në të njëjtën kohë, kryeministri izraelit Benjamin Netanyahu pritet të zhvillojë bisedime në Uashington me presidentin Trump. Vizita vjen në një moment tensionesh të larta, ndërsa Tel Avivi vazhdon të mbështesë një qasje më të ashpër ndaj programit bërthamor dhe raketor të Iranit.
Sipas mediave amerikane, drejtues ushtarakë i kanë rekomanduar Shtëpisë së Bardhë të shmangë një konflikt të zgjatur, duke paralajmëruar se rezervat e disa armëve po pakësohen. Kjo duket se ka ndikuar në vendimin për të pezulluar përkohësisht sulmet, ndërsa përpjekjet diplomatike për të ulur tensionet në rajon vijojnë.
/vizionplus.tv
