Rreth 5.800 persona janë arrestuar dhe janë sekuestruar afro 300 milionë dollarë gjatë një operacioni global kundër mashtrimeve me manipulim psikologjik, i zhvilluar nga janari deri në prill të këtij viti, njoftoi Interpol.
Operacioni, i quajtur “First Light 2026”, u koordinua nga Interpol me pjesëmarrjen e forcave të rendit nga 97 vende dhe kishte si objektiv kryesor goditjen e skemave të mashtrimit që shfrytëzojnë besimin e viktimave për të përfituar para ose informacione konfidenciale.
Sipas Interpolit, operacioni u fokusua në raste si mashtrimet përmes e-maileve të kompanive, shantazhet seksuale online (sextortion), mashtrimet romantike në internet, vjedhja e identitetit dhe mashtrimet me investime të rreme.
Gjatë aksionit u identifikuan mbi 142.000 viktima, një shifër që, sipas Interpolit, tregon se këto forma të kriminalitetit janë shndërruar në një kërcënim serioz global për qytetarët, bizneset dhe institucionet shtetërore.
Një nga rastet më të bujshme u regjistrua në Esuatini, ku autoritetet arrestuan 82 persona dhe shkatërruan një rrjet kriminal që organizonte lojëra të paligjshme të fatit online dhe pastronte para të përfituara nga mashtrime të sofistikuara me vjedhje identiteti.
Në një tjetër operacion, hetuesit zbuluan një ambient të ndërtuar si një stacion policie braziliane, me uniforma false. Mashtruesit shtirreshin si efektivë të policisë federale gjatë videotelefonatave, duke bindur viktimat se ishin objekt hetimi ose viktima të një krimi dhe duke i detyruar të transferonin paratë e tyre në llogari të kontrolluara nga grupi kriminal.
Interpol bëri të ditur gjithashtu se një kompani tregtare në Singapor u vu në shënjestër nga mashtrues që u paraqitën si furnitorë të saj, ndërsa në Makao u arrestuan persona që hiqeshin si zyrtarë shtetërorë dhe tentuan të bindnin një viktimë të transferonte rreth 372 mijë dollarë amerikanë me pretendimin se fondet do të mbroheshin në kuadër të një hetimi për mashtrim.
Autoritetet ndërkombëtare theksuan se operacione të tilla do të vazhdojnë, pasi mashtrimet online dhe manipulimi psikologjik po përhapen me ritme të shpejta në mbarë botën.
/vizionplus.tv
