Gjykata e Lartë e Spanjës ka shpallur të pafajshme këngëtaren kolumbiane Shakira ndaj akuzave për evazion fiskal dhe ka anuluar një gjobë prej 55 milionë eurosh të vendosur nga autoritetet spanjolle në vitin 2021.
Sipas vendimit të gjykatës, autoritetet tatimore nuk arritën të provonin se artistja kishte qëndruar në Spanjë për më shumë se 183 ditë gjatë vitit 2011, kufiri minimal që kërkohet për ta konsideruar një person rezident fiskal në vend.
Gjykata urdhëroi gjithashtu shtetin spanjoll t’i kthejë këngëtares më shumë se 60 milionë euro, së bashku me interesat përkatëse.
Autoritetet fiskale kishin argumentuar se Shakira kishte lidhje të forta me Spanjën për shkak të marrëdhënies së saj me ish-futbollistin Gerard Piqué dhe se qendra e aktiviteteve të saj ndodhej në këtë vend.
Megjithatë, gjykata vlerësoi se gjobat ishin vendosur në mënyrë të paligjshme, pasi nuk u provua se këngëtarja kishte rezidencë fiskale në Spanjë gjatë vitit 2011.
Avokati i saj, José Luis Prada, deklaroi se vendimi i jep fund një procesi tetëvjeçar që, sipas tij, pati pasoja të padrejta për artisten.
Në një reagim publik, Shakira u shpreh se shpreson që ky vendim të shërbejë si precedent për qytetarët që, sipas saj, përballen me padrejtësi nga sistemi tatimor.
Megjithatë, çështja nuk lidhet me hetimet fiskale për vitet 2012-2014. Në vitin 2023, këngëtarja kishte arritur marrëveshje me prokurorët në Barcelona për të shmangur gjyqin mbi akuzat për mospagim të 14.5 milionë eurove taksa, duke pranuar pagesën e një gjobe prej mbi 7.3 milionë eurosh.
/vizionplus.tv
