Rritet niveli i lumit Seman, situata pritet të përkeqësohet

Lumi Seman ka regjistruar ditën e sotme një rritje të nivelit të prurjeve, ndërsa autoritetet e emergjencave civile ndodhen në terren për të monitoruar situatën dhe për të marrë masat e nevojshme. Sipas informacionit të dhënë nga strukturat përgjegjëse, prurjet e ujit pritet të rriten edhe më shumë gjatë orëve të pasdites për shkak të shkarkimeve të mëdha nga hidrocentrali i Banjes.

Banorët që jetojnë pranë lumit dhe drejtuesit e mjeteve janë paralajmëruar të tregojnë kujdes, të shmangin kalimet në zona të rrezikshme dhe të jenë të gatshëm për çdo ndërhyrje emergjente. Strukturat e emergjencave po mbajnë kontakte të vazhdueshme me bashkitë përkatëse për koordinimin e veprimeve në terren dhe për informimin e komunitetit në kohë reale.

Situata pritet të jetë më problematike në orët e pasdites, ndërsa autoritetet paralajmërojnë se niveli i ujit mund të ndikojë në zonat përreth lumit dhe të rrezikojë pjesë të infrastrukturës rrugore dhe tokat bujqësore.

/vizionplus.tv