Reshjet intensive të shiut, të shoqëruara me shkarkime të shtuara nga hidrocentralet e Vaut të Dejës dhe lumit të Gjadrit, kanë sjellë rritje të ndjeshme të niveleve të lumit Drin dhe kanaleve të ujërave të larta në territorin e Bashkisë Lezhë.
Si pasojë, qindra hektarë tokë bujqësore janë përmbytur, ndërsa situata parashikohet të përkeqësohet në orët në vijim. Lumi Drin po shënon rritje të shpejtë të nivelit të ujit dhe në lagjen “Skënderbeg” ka përmbytur edhe shëtitoren, duke shtuar rrezikun për përmbytje të mëtejshme.
Autoritetet bëjnë me dije se rreziku mbetet i lartë, ndërsa strukturat e emergjencave civile janë në terren dhe po monitorojnë nga afër situatën për të ndërhyrë në rast nevoje.
Në këtë kuadër, Bashkia Lezhë ka dalë me një njoftim zyrtar drejtuar qytetarëve, duke kërkuar bashkëpunim dhe raportim të menjëhershëm të çdo situate problematike./vizionplus.tv
