Reshjet intensive të ditëve të fundit kanë vijuar të shkaktojnë problematika në disa zona të qarkut Korçë, ndërsa strukturat vendore dhe ekipet e emergjencave civile kanë punuar pa ndërprerje për menaxhimin e situatës dhe normalizimin e infrastrukturës.
Në territorin e bashkive të qarkut janë evidentuar rrëshqitje dherash, prurje të rritura në lumenj, dëmtime argjinaturash dhe bllokime të përkohshme të akseve rurale. Në Voskopojë dhe Voskop, ekipet kanë ndërhyrë për pastrimin e rrugëve dhe riparimin e argjinaturave të dëmtuara nga prurjet e larta, ndërsa në Çiflig të Bulgarecit është punuar me ekskavator për pastrimin e tombinove përgjatë unazës. Monitorim i vazhdueshëm po kryhet edhe në lumin e Kamenicës dhe degëzimet e tij mbi Dvoran, të cilat paraqesin rritje të konsiderueshme të prurjeve. Vazhdojnë edhe punimet për funksionalizimin e rrugës Tudas–Lavdar–Bozdovec–Mazrekë, që ishte prekur nga rrëshqitjet e dheut.
Në Kolonjë është ndërhyrë për devijimin e rrjedhës së lumit pranë urës së Qinamit, duke shmangur rrezikun ndaj këmbëve të saj. Në Starje janë larguar ujërat e mbledhura në lagjen Kaskollare, ndërsa në Prodan punimet janë fokusuar në shtratin e lumit. Në qytetin e Ersekës, shërbimi zjarrfikës ka pastruar pusetën qendrore të ujit, ndërsa sipas vlerësimit të NJVKSH-së, furnizimi me ujë të pijshëm është normalizuar.
Zona e Maliqit mbetet ndër më të prekurrat, ku janë evidentuar çarje në argjinaturat e lumenjve Dunavec dhe Devoll. Subjektet private, strukturat vendore dhe Mbrojtja Civile kanë nisur punën që në orët e para të mëngjesit për mbylljen e tyre, me qëllim shmangien e përmbytjeve të mëtejshme në tokat bujqësore dhe zonat e banuara.
Në Pustec situata paraqitet e qetë, pa problematika të raportuara, ndërsa të gjitha rrugët dhe shërbimet funksionojnë normalisht.
Në Devoll, punimet janë përqendruar në fshatin Progër, ku janë riparuar pritat e dëmtuara të lumit dhe është çakulluar rruga e dëmtuar nga erozioni. Në Hoçisht është ndërhyrë për sistemimin e lumit të Borshit, pasi çarja e tij kishte përmbytur sipërfaqe të konsiderueshme tokash bujqësore.
Në Pogradec, komisionet e verifikimit kanë evidentuar dëme në 62 familje, të cilat janë pajisur me procesverbalet përkatëse dhe janë mbështetur me ndihma ushqimore. Problematikat kryesore janë regjistruar përgjatë lumit të Verdovës, lumit të Rëmenjit dhe në zonën e grykëderdhjes pranë gurores, ku ekipet kanë ndërhyrë për menaxhimin e rrjedhjeve. Në Njësinë Administrative Dardhas janë pastruar katër akse rrugore dhe qarkullimi është rikthyer normalisht. Në aksin Pogradec–Buçimas, pranë fshatit Gështenjas, ka ceduar rreth 50 metra nga korsia e biçikletave për shkak të rrëshqitjeve. Në rezervuarin Stropskë 2 është konstatuar një shkarje dherash në një sipërfaqe prej rreth 4 dynymësh dhe ekipet e emergjencave po vlerësojnë rrezikshmërinë. Ndërkohë, Hidrovori i Tushemishtit vijon punën normalisht.
Furnizimi me energji elektrike në qark është kryesisht i stabilizuar. Pa energji vijon të mbetet zona rurale e Kurteshit (11 abonentë), ndërsa të gjitha linjat që furnizojnë institucionet e rëndësisë së veçantë funksionojnë pa probleme. Hidrovori i Pogradecit operon normalisht.
Në aksin Qukës–Qafë Plloçë, subjektet kontraktore kanë vijuar largimin e inerteve nga shtrati i rrugës pas rrëshqitjeve të njëpasnjëshme, ndërsa qarkullimi është i mundur falë hapjes së një rruge sekondare.
Strukturat vendore dhe ekipet e emergjencave civile vijojnë të monitorojnë situatën në të gjithë qarkun, duke ndërhyrë në kohë reale në zonat problematike për të garantuar sigurinë e komunitetit dhe funksionimin e infrastrukturës.
/vizionplus.tv
