Pas lajmit të arrestimit të ish-zyrtarit të lartë të FBI, Vizion Plus iu drejtua Departamentit të Drejtësisë në SHBA, për të mësuar më shumë mbi raportet e tij me Shqipërinë.
Në përgjigjen zyrtare, Departamenti nënvizon se nuk mund të bëjë publike detaje mbi hetime që janë në zhvillim e sipër.
“Në praktikën e tij, Departamenti i Drejtësisë nuk komenton në lidhje me një çështje aktive gjyqësore apo për komunikimet me qeveri të tjera për rastet hetimore. Kësisoj, edhe për pyetjet në fjalë nuk mund të ketë një përgjigje tjetër përveç dokumentave që tashmë janë publike”. – thuhet ne reagim.
Ndërkohë, kryeministri reagoi duke thënë se nuk ka asnjë lidhje me akuzat ndaj ish-zyrtarit të FBI në SHBA. Por në Shqipëri, sipas tij, menjëherë nisi gjyqi politik.
Rama nënvizon se këtë rradhë ka zgjedhur të mos merret me akuza pa fakte, por të fokusohet tek punët dhe shqetësimet reale të njerëzve.
