Qytetarët mbjellin pemë në Korçë, nismë për gjelbërimin e rrugës që lidh qytetin me fshatin Boboshticë

Një nismë qytetare ka nisur në Korçë, ku një grup banorësh kanë ndërmarrë një aksion për pyllëzimin e anëve të rrugëve, me synimin për të gjelbëruar dhe zbukuruar një nga segmentet më të frekuentuara turistike të zonës.

Iniciativa po realizohet në bashkëpunim me Drejtorinë Rajonale të Rrugëve Kombëtare Korçë, e cila ka financuar blerjen e rreth 500 fidanëve, të cilët do të mbillen nga dalja e qytetit deri në fshatin turistik Boboshticë.

Sipas organizatorëve, qëllimi i kësaj nisme është jo vetëm përmirësimi estetik i këtij segmenti rrugor, por edhe krijimi i një hapësire më të gjelbër dhe më të freskët për banorët dhe vizitorët që udhëtojnë drejt zonave turistike të juglindjes.

Pas përfundimit të mbjelljes së fidanëve, pritet që pas disa vitesh ky segment të marrë një pamje krejt tjetër.

Të gjithë ata që do të udhëtojnë drejt Boboshticës, Dardhës, Nikolicës, Arrzës apo Sinicës do të kenë mundësinë të shijojnë një rrugë më të gjelbëruar dhe një ambient më tërheqës përgjatë këtij itinerari turistik.