Qeveri po ndryshon për herë të katërt buxhetin e shtetit nëpërmjet një akti normativ, që sipas ministres së Financave është i nevojshëm për t’i dhënë më shumë stimuj ekonomisë. Ndryshimi konsiston në rritjen me 11.8 miliard lekë të shpenzimeve kapitale, ku pritet të financohen një sërë projektesh infrastrukturore. Anila Denaj argumentoi se cilat janë investimet prioritare.
“Ndryshimet konsistojnë në rritjen me 11.8 miliard lekë të investimeve, kryesisht të atyre që janë në proces dhe kanë një ecuri të mirë. 4.8 mld lekë shkojnë për Unazën e Madhe të Tiranës, 1 mld lekë për blerje dronësh për Policinë e Shtetit, 900 mln për ndërtimin e godinës së teatrit, 2.5 mld për ujësjellës kanalizimet etj.”
Këto shpenzime do të financohen me borxh, pasi qeveria nuk parashikon rritje të të ardhurave. Ky fakt bën që borxhi publik të kalojë 80% të Prodhimit të Brendshëm Bruto. Qeveria, më herët kishte parashikuar dhe miratuar të ulë më tej këtë tregues, por me ndryshimet ligjore ajo argumenton se ekonomia ka nevojë për stimuj për të amortizuar efektet e pandemisë.
“Borxhi pritet të arrijë në 80% të PBB, është një tregues i targetuar sa në vitin 2020. Duhet thënë që ky ndryshim buxhetor, ndryshe nga kuadri fiskal që synon uljen e tij, bën përjashtim vetëm për vitin 2021. Ndërkohë, qeveria mbetet e angazhuar për ta ulur borxhin në 5 vitet e ardhshme”, tha Anila Denaj.
Më herët, edhe FMN ka bërë apel për reduktim të shpenzimeve jo prioritare, madje sipas saj, qeveria duhet të ruajë rezerva në rast të një skenari negativ të situatës pandemike gjatë sezonit dimëror.
