Një ngjarje tragjike ka ndodhur të shtunën e kaluar në ishullin grek të Santorinit, ku një pastruese shqiptare 59-vjeçare ka humbur jetën në vendin e punës, si pasojë e rrëzimit të një krevati me mekanizëm të dëmtuar.
Sipas faqes lokale Santonews.com, gruaja kishte disa vite që punonte në Santorini për të mbajtur familjen, pas humbjes së bashkëshortit. Ajo ishte nënë e tre fëmijëve dhe së shpejti do të bëhej gjyshe, pasi njëra nga vajzat e saj është në muajt e fundit të shtatzënisë. Pikërisht kjo vajzë ka marrë përsipër procedurat për transportimin e trupit të nënës së saj drejt Shqipërisë, ku pritet të bëhet edhe ceremonia mortore.
Ngjarja ndodhi gjatë kohës që gruaja po punonte në një rezidencë private. Një anëtar i sindikatës së pastruesve deklaroi për Santonews se krevati që i shkaktoi vdekjen ishte i madh dhe i pajisur me një mekanizëm ngritës për ruajtjen e sendeve poshtë tij. Ky mekanizëm, sipas tij, nuk funksionoi siç duhet, duke bërë që korniza metalike dhe dysheku t’i binin në qafë punonjëses, duke e lënë atë pa jetë në vend.
Policia ka arrestuar pronarin e banesës, i cili është njëkohësisht edhe përfaqësuesi dhe menaxheri i biznesit që e kishte punësuar viktimën. Ai po përballet me akuza për vrasje nga pakujdesia dhe aksident në vendin e punës, ndërsa autoritetet kanë urdhëruar kryerjen e një ekspertize mjeko-ligjore për zbardhjen e plotë të rrethanave të ngjarjes.
/vizionplus.tv
