Punonjësit e sektorit publik grek, përfshirë mësuesit, mjekët dhe stafet e transportit publik lanë punën këtë të enjte për të protestuar kundër ndryshimeve të ligjit të kodit të punës që qeveria po planifikon.
Qeveria e kryeministrit Kyriakos Mitsotakis thotë se ndryshimet do të eleminonin punën e padeklaruar dhe do të nxisnin punësimin në përgjithësi por është kundërshtuar nga opozita e cila pretendon se plan i ri do të shkelë të drejtat e punëtorve dhe do të krijojë kushte të papërshtatshme në punë.
Trenat dhe autobusët në shtetin fqinj po funksionojnë me orë të reduktuara gjatë grevës njëditore mbarëkombëtare ndërsa spitalet shtetërore po operojnë me staf të urgjencës dhe shumë shkolla u mbyllën.
Punëtorët u mblodhën në qendër të Athinës dhe marshuan drejt parlamentit grek ndërkohë që diskutohej për projektligjin. Sindikata e cila përfaqëson pjesën më të madhe të punonjësve në Greqi kërkon tërheqjen e ndryshimeve.
Projektligj do t’i lejojë punonjësit me kohë të plotë të bëjnë një punë të dytë me kohë të pjesshme dhe të punojnë deri në 13 orë në ditë. Po ashtu nëse ky projekt ligj miratohet, një punonjës mund të pushohet nga puna brenda vitit të parë të punës pa paralajmërim apo shpërblim, përveç rasteve kur është rënë dakord ndryshe.
Ai lejon një periudhë prove deri në gjashtë muaj, por gjithashtu detyron punëdhënësit të japin kushte të detajuara të punës.
Punëdhënësit do të përballen me një gjobë deri në 10,500 euro nëse nuk deklarojnë zgjatjen e orarit të punës nga një punonjës ose ndryshimin e turneve.
Projektligji gjithashtu prezanton gjoba dhe një afat burgimi prej gjashtë muajsh ndaj atyre që pengojnë punonjësit të punojnë gjatë një greve.
