Presidenti Ilir Meta, ende nuk ka firmosur dekretin për ministrin e ri të Brendshëm Sandër Lleshi.
Kreu i shtetit pohoi për mediat se nuk do të hedhë firmë për dekrete formale, aq me tepër për një detyrë të tillë që kërkon përgjegjshmëri maksimale.
“Do gjej kohën e duhur, për të marrë vendimin e duhur. Presidenti ka për detyrë për të ushtruar të gjitha detyrimet kushtetuese për çdo propozim që i bëhet. Nuk mund të hedh firmë për dekrete formale e aq më tepër për një detyrë të tillë që në momentin aktual, kërkon përgjegjshmëri. Di të marr vendimet e mua, pa u ndikuar nga askush, as nga orët dhe sekondat. Kushtetuta është shumë e qartë, presidenti ka përgjegjësi për çdo firmë që hedh. Ua kam thënë të qartë kam bërë punën time institucionale, kam bërë përpjekjet e mia, kam qenë mjaft bashkëpunues me institucionet dhe personat e interesuar për këtë çështja, dhe unë i marr vendimet e mia pa i ndikuar nga askush. Më duket se Kushtetuta është shumë e qartë, presidenti ka përgjegjësi për çdo firmë që hedh.”
Meta shtoi se Shqipria ka sfidë luftën kundër krimit të organizuar dhe të gjitha prioritetet lidhen me këtë çështje. Ndaj askush sipas tij të mos mendojë se presidenti mund të firmose vetem ne menyre formale letrat qe i sjellin.
“Lufta ndaj krimit të organizuar ka një rritje të ndikimit në jetën politike, dhe sfida ndaj saj nuk është vetëm përgjegjësi e qeverisë dhe parlamentit por edhe e presidentit. Ministri që dha dorëheqjen Xhafaj, tregoi një vullnet për të ecur në këtë drejtim pavarësisht nga rrethanat e komplikuara, por në çdo rast kjo është betejë e të gjithëve. Përgjegjësitë janë shumë të rëndësishme për të mos iu bindur askujt që do të përpiqet të ndikonte politikisht në policinë e shtetit”.
Gjithashtu Meta ka theksuar se nuk ka njohje personale me Lleshin, dhe se i siguron të gjithë se askush nuk e detyron atë të firmosë një emër jashtë bindjes së tij.
Ndërkohë mbetet për tu parë se çfarë do të vendosë Ilir Meta, por nëse do ta refuzonte dekretimin e Lleshit, ky do të ishte rasti i parë që presidenti nuk dekreton një minister.
