Të paktën 22 persona kanë humbur jetën brenda dymbëdhjetë ditësh si pasojë e përmbytjeve që kanë goditur Kolumbinë, ku mijëra banesa ndodhen nën ujë për shkak të reshjeve të dendura dhe të pazakonta për këtë periudhë të vitit.
Vetëm në departamentet e Kordobës dhe Sukres, autoritetet kanë konfirmuar 14 viktima dhe të paktën 9.000 familje të prekura nga përmbytjet.
Në këtë rajon kryesisht blegtoral, banorët po përpiqen të shpëtojnë pasuritë e fundit me ndihmën e skafeve, mjeteve lundruese të improvizuara dhe kamionëve, në zonat më të goditura, ku niveli i ujit arrin deri në mes të trupit të njerëzve, sipas dëshmive të mbledhura nga një gazetar i Agjencisë Franceze të Lajmeve (AFP).
“Humbëm gjithçka: sendet tona, pajisjet shtëpiake. Jemi shumë të shqetësuar sepse nuk e dimë se çfarë do të ndodhë,” thotë Enid Gomez, 43 vjeçe.
“Nuk na ka mbetur asgjë përveç rrobave që kemi veshur,” shton ajo nga Montería, kryeqyteti i Kordobës, ku numri i personave të prekur ka arritur në rreth 150.000.
Të dielën, autoritetet kolumbiane kishin njoftuar për të paktën 13 viktima gjatë javës së kaluar në disa rajone të vendit, si pasojë e reshjeve të fuqishme.
Sipas Institutit Kombëtar të Meteorologjisë (IDEAM), një front i ftohtë që mbërriti në Karaibet kolumbiane nga pjesa veriore e kontinentit amerikan ka rritur reshjet me mbi 64% gjatë muajit janar krahasuar me mesataren. Instituti thekson se ky fenomen po ndodh “në kuadër të krizës klimatike”.
