Përfundon samiti historik Trump-Xi-Putin në Kinë, zgjati 90 minuta! Xi kërkon shmangien e luftës bërthamore

Ka përfunduar pas rreth një ore e gjysmë takimi historik trepalësh mes presidentit kinez Xi Jinping, presidentit amerikan Donald Trump dhe presidentit rus Vladimir Putin, i zhvilluar në Shenzhen të Kinës, në kuadër të samitit të APEC-ut.
Lajmi u raportua nga televizioni shtetëror kinez CCTV, ndërsa pamjet e transmetuara drejtpërdrejt treguan autokolonën e presidentit amerikan Donald Trump duke u larguar nga Vila Qilin Shanzhuang në drejtim të aeroportit.
Ky ishte takimi i parë i përbashkët mes liderëve të tri fuqive të mëdha, i cili u zhvillua nën kryesimin e Xi Jinping dhe në qendër të të cilit ishin siguria ndërkombëtare, konfliktet globale dhe çarmatimi bërthamor.
Gjatë fjalës së tij, presidenti kinez bëri thirrje që Kina, SHBA-ja dhe Rusia të veprojnë si miq dhe aleatë, duke shmangur përplasjet dhe duke ruajtur kanalet e komunikimit mes tyre.
Xi theksoi rëndësinë e bashkëjetesës paqësore, kontakteve të rregullta në nivelin më të lartë dhe krijimit të mekanizmave për parandalimin e krizave, me qëllim shmangien e keqkuptimeve dhe përshkallëzimit të tensioneve.
Një vëmendje të veçantë ai i kushtoi kërcënimit bërthamor.
“Një luftë bërthamore nuk mund të fitohet dhe nuk duhet të zhvillohet kurrë”, deklaroi Xi Jinping, duke bërë thirrje për parandalimin e një konflikti të tillë, respektimin e Traktatit të Mospërhapjes Bërthamore dhe ruajtjen e stabilitetit strategjik global.
Edhe presidenti amerikan Donald Trump e cilësoi takimin si historik, duke theksuar përgjegjësinë e veçantë që kanë tre vendet për të mbajtur të hapura kanalet e komunikimit.
“Ne po bëjmë histori. Ne të tre kemi shumë për të diskutuar dhe tashmë kemi diskutuar shumë”, deklaroi Trump gjatë fjalës së tij hapëse.
Ai u ndal gjithashtu te çarmatimi bërthamor, duke argumentuar se SHBA-ja, Kina dhe Rusia kanë një pozicion unik për të kontribuuar në uljen e numrit të armëve bërthamore në botë.
Në të njëjtën kohë, Trump përsëriti qëndrimin e Uashingtonit kundër pajisjes së Iranit me armë bërthamore.
“Ne nuk do ta lejojmë Iranin të ketë një armë bërthamore”, theksoi presidenti amerikan.
Ndërkohë, sipas një analize të publikuar nga “The New York Times”, samiti duket se i ka dhënë presidentit kinez Xi Jinping përfitimin diplomatik që synonte, mundësinë për të pritur dhe drejtuar një takim mes dy fuqive më të mëdha bërthamore, SHBA-së dhe Rusisë, pa marrë përsipër angazhime që mund ta rëndonin Pekinin.
Sa i përket luftës në Ukrainë, raportimi thekson se takimi nuk prodhoi angazhime konkrete nga Kina për këtë konflikt.
Përfundimi i samitit shënon mbylljen e një takimi me rëndësi të veçantë diplomatike, ndërsa ende nuk janë bërë të ditura detaje të plota mbi rezultatet konkrete të bisedimeve dhe marrëveshjet e mundshme mes tre liderëve.




