Partia Demokratike ka akuzuar kryeministrin Rama dhe drejtuesen e prokurorisë Elisabeta Imeraj se po ushtrojnë presion tek prokurorët për arrestimin e kreut të opozitës Lulzim Basha.
Në një dalje për mediat, sekretari i Përgjithshëm i PD, Gazment Bardhi deklaroi se presioni po ushtrohet me qëllim që të hiqet vëmendja nga përgjimet që ka paraljmëruar gazetari i BILD.
Bardhi duke u shprehur se ky skenar do të dështoi, paralajmëroi prokuroren Imeraj dhe kryeministrin Rama se po provokojnë opozitën përmes një akti kriminal.
“Me urdhër direkt të Edi Ramës, drejtuesja e Prokurorisë së Tiranës Elisabeta Imeraj në dhunim flagrant të ligjit po ushtron presion të paligjshëm ndaj prokurorëve të çështjes për shoqërimin me forcë dhe arrestimin e kryetarit të opozitës, ndonëse kryetari i opozitës ka konfirmuar vullnetin për tu paraqitur në prokurori sapo kjo e fundit të zbatojë ligjin për thirrjen e tij. Ky presion kriminal përmes urdhrave të paligjshëm të prokurores së kapur Elisabeta Imeraj po ushtrohet me urdhër direkt të Edi Ramës me qëllim për të larguar vëmendjen nga përgjimet e reja që ka paralajmëruar se do të publikojë sot gazeta gjermane BILD. Partia Demokratike paralajmëron prokuroren Imeraj dhe shefin e saj Edi Rama se ky skenar kriminal do të dështojë dhe ata do të jenë përgjegjës direkt për këtë veprim kriminal të paprecedentë të shkeljes së ligjit dhe provokimit ndaj opozitës. Kamikazaja Imeraj nuk do ta shpëtojë dot Edi Ramën. Asgjë nuk e shpëton dot Edi Ramën. As drejtësia e kapur prej tij.”
