Kërkesa e anëtarësisë demokrate për të zhvilluar mbledhjen e Këshillit të Mandateve lidhur me imunitetin e zëvëndëskryeministres Belinda Balluku, u refuzua për herë të dytë.
Ndryshe nga hera e parë, opozitarët morën një përgjigje me shkresë nga kryeparlamentari Niko Peleshi, i cili shprehet se duhet pritur vendimi i Gjykatës Kushtetuese.
“Peleshi na thotë se Balluku ka kërkuar tri javë kohë dhe ai është i vendosur t’i garantojë asaj të drejtën e mbrojtjes. Çdo kriminel që kërkon të zvarrisë drejtësinë e kërkon këtë. Niko Peleshi sqaron se Gjykata Kushtetuese i ka kërkuar të japë një vendim mbi një çështje që lidhet drejtpërdrejt me shqyrtimin parlamentar dhe se, për këtë arsye, nuk mund të mblidhet Këshilli”, tha Bardhi.
Sipas Bardhit mazhoranca po përpiqet të mbrojë numrin dy të qeverisë duke zvarritur çështjen.
“Nuk ka ndodhur që nga Kryesia e Kuvendit të shndërrohet në bunkerin e Belinda Ballukut. Sot Kuvendi është bunkeri i Belinda Ballukut, ku mendojnë se do të pengojnë drejtësinë të bëjë detyrën e saj. E kanë shumë gabim”, shtoi Bardhi.
Shefi i deputetëve opozitarë sqaroi se do të kërkojnë sërish mbledhje javën e ardhshëm.
“Në fillim të javës që vjen do të kërkojmë mbledhjen e radhës. Jemi 24/24 në dispozicion të këtij procesi. Nuk kemi marrë mandat për të mbrojtur korrupsionin, por për ta luftuar. Ndjej keqardhje që kryetari i Kuvendit thotë që kur të plotësohen kushtet procedurale të zhvillohet mbledhja”, deklaroi Gazment Bardhi.
Më herët, Bardhi tha se kreu i parlamentit ka mbyllur çdo sallë të Kuvendit si dhe atë të PD-së duke mos lejuar as zhvillimin e një takimi me gazetarët në zyrë.
Mbledhja e parë e Këshillit të Imunitetit dhe Mandateve u zhvillua më 19 dhjetor, me pjesëmarrjen e anëtarëve 5 nga opozita dhe 5 nga mazhoranca si dhe nën prezencën e 3 prokurorëve të posaçëm, drejtuesit të ri të SPAK Klodian Braho dhe dy prokurorëve të çështjes Dritan Prençi dhe Dorina Bejko./vizionplus.tv
