Rama fton për të tretën ditë radhazi protestuesit në dialog, vendos stola guri para Kryeministrisë

Kryeministri Edi Rama ka përsëritur edhe këtë të enjte thirrjen për dialog me protestuesit, duke zgjedhur një mënyrë të re për të përcjellë mesazhin e tij. Këtë herë, para godinës së Kryeministrisë janë vendosur stola guri me mbishkrimin “Dialog”, pasi karriget e vendosura në dy ditët e mëparshme u hoqën dhe u thyen nga protestuesit.

Përmes një videoje të publikuar në rrjetet sociale, Rama ka shoqëruar pamjet me përshëndetjen “Mirëmëngjes”, duke përcjellë sërish ftesën e tij për dialog me studentët.

Kjo është dita e tretë radhazi që kreu i qeverisë u bën thirrje protestuesve për t’u ulur në tryezën e dialogut, ndërsa protestuesit kanë vijuar të refuzojnë ftesën e tij, duke kërkuar dorëheqjen e kryeministrit.

Protestat kanë hyrë në ditën e nëntë, me pjesëmarrjen edhe të pedagogëve të universiteteve publike, të cilët i janë bashkuar tubimeve dhe kanë nisur bojkotin e mësimdhënies.