Pas krizës ndërkombëtare financiare të 2009, tregu i makinave të reja në vendin tonë ka shënuar rritje modeste nga viti në vit, gati e papërfillshme. Por 2020 duket se do të mbyllet me një bilanc aspak pozitiv. Si në shumë sektorë të ekonomisë, edhe në këtë fushë pandemia ka stepur shitjet. Në 2019 rezultojnë se u shitën rerth 3.000 automjete të reja, por ky vit duket se do të mbyllet me rreth 1.000 automjete më pak. Por kush kanë qenë blerësit e makinave të reja në këtë vit të pazakontë?
“Tregu ka pasur një rënie në përgjithësi. Por kërkesa tek kompania jonë është fokusuar më së shumti tek makinat e punës, duke patur në konsideratë faktin e cilësisë me të cilën konkurron marka “Ford” në këtë drejtim”, tha Artan Mirdita, drejtor i markës “Ford”.
“Bizneset e distribucionit, ato të kateringut apo sektori i shitjeve online kanë patur kërkesën më të madhe këtë vit për të blerë makina”, thotë Eno Zeneli menaxher i
“Automaster”.
Nuk kanë munguar edhe shitjet e makinave individuale, edhe pse kërkesa e qytetarëve ka qenë e ulët, krahasuar me një vit më parë. Por kjo kërkesë lidhet ngushtësisht me markën e automjeteve.
“Duke patur parasysh që marka Hyundai është e orientuar drejt makinave familjare, kërkesa më e madhe ka qenë në të njëjtin drejtim. Edhe pse tregu në tërësinë e tij ka rezultuar me rënie, ne mund të themi se kemi patur 20% rritje si markë në raport me një vit më parë”, thotë Gerard Merdani, drejtor i markës “Hyundai”.
Për sektorin e automjeteve të reja, shteti mbetet një nga klientët kryesorë, por këtë vit për shkak të pandemisë, duket se institucionet nuk janë fokusuar në shpenzime të tilla. Nisur nga ky vit i vështirë, koncesionarët e makinave kanë sjellë oferta në treg për të nxitur kërkesën, por shqiptarët për shkak të pasigurive janë orientuar drejt kursimeve. Por teksa tregu botëror i ka sytë nga dalja e vaksinës, për bizneset e kësaj fushe, ky është një sinjal i mirë që bilanci i 2020 të mund të përmirësohet në vitin e ardhshëm. E rëndësishme është që të mos humbasë sezoni turistik, i cili është i lidhur ngushtë me transportin.
