Presidenti i SHBA-së, Donald Trump, pritet të informohet nga kryeministri izraelit Benjamin Netanyahu se çdo zgjerim i programit iranian të raketave balistike përbën një kërcënim serioz, që mund të kërkojë veprim të menjëhershëm. Lajmi është raportuar të shtunën nga NBC News, duke cituar burime të njohura me çështjen.
Sipas medias amerikane, zyrtarë izraelitë po shprehin shqetësim në rritje se Irani po zgjeron prodhimin e raketave balistike, pavarësisht se ky program kishte pësuar dëme nga sulmet ushtarake izraelite më herët gjatë këtij viti. Burime të njohura me planet dhe ish-zyrtarë amerikanë bëjnë të ditur se Izraeli po përgatitet të informojë presidentin Trump për opsione të mundshme të një sulmi të ri.
Të njëjtat burime thonë se autoritetet izraelite dyshojnë gjithashtu se Irani po rindërton objekte të pasurimit bërthamor, të cilat ishin bombarduar nga SHBA-ja në muajin qershor. Megjithatë, sipas tyre, kërcënimi më i menjëhershëm lidhet me përpjekjet e Teheranit për të rivënë në funksion kapacitetet e prodhimit të raketave balistike dhe për të riparuar sistemet e mbrojtjes ajrore që janë dëmtuar rëndë.
Donald Trump dhe Benjamin Netanyahu pritet të takohen më vonë gjatë këtij muaji në Florida, në rezidencën Mar-a-Lago të presidentit amerikan. Gjatë këtij takimi, Netanyahu pritet të theksojë se zgjerimi i programit raketor iranian përbën një rrezik që mund të kërkojë reagim të menjëhershëm.
Sipas burimeve, kryeministri izraelit do të argumentojë se veprimet e Iranit përbëjnë kërcënim jo vetëm për Izraelin, por edhe për stabilitetin e rajonit dhe interesat amerikane. Ai pritet t’i paraqesë Trumpit edhe opsione për përfshirjen ose mbështetjen e SHBA-së në operacione të mundshme të reja ushtarake.
I pyetur të enjten për takimin e planifikuar më 29 dhjetor me Netanyahun, Trump u tha gazetarëve: “Nuk e kemi caktuar zyrtarisht, por ai do të donte të më takonte”. Ndërkohë, zyrtarë izraelitë kanë konfirmuar se takimi pritet të zhvillohet më 29 dhjetor.
