Këtë të shtunë do të nis përzgjedhja e dhjetë degëve të studimit për raundin e dytë nga maturantët, që ende nuk kanë siguruar një vend në universitetet e vendit.
Portali do të qëndrojë i hapur për tre ditë, ndërsa të rinjtë mund të përzgjedhin mes degëve që kanë ende kuota të lira.
“Kemi pak programe që janë ezauruar mund t’i rendisim këtu nga Universiteti i Mjekësisë, Mjekësinë e Përgjithshme dhe Stomatologjinë që i kanë ezauruar, Farmacia ka vetëm një kuotë, te Infermieria kanë ngelur pak kuota, gjithashtu Universiteti Politeknik, FAU i ka ezauruar të tre programet që ofron. Janë dy Akademitë e Mbrojtjes dhe e Sigurisë që i kanë ezauruar të gjitha kuotat. Kryesisht degët e tjera kanë kuota, ku më shumë e ku më pak”, tha Arian Xhelaj, drejtor i RASH.
Megjithatë kriteret e mesatares vijojnë të mbeten të njëjta, ndërsa për degët të cilat kanë kriter pranimi, konkurset do të kenë të tjera data.
“Kriteri i mesatares vlen edhe për këtë raund. Kush ka mesataren 6.5 mund të aplikojë për programe Bachelor dhe ato nën 6.5 në Programe Profesionale. Edhe Programet Profesionale kanë pasur një ecuri të mirë mbi 7% besoj gjatë raundit të dytë do të rritet pasi edhe ky grupim maturantësh janë maturantë që vijnë nga vjeshta e mbase nuk kanë rezultatet më të mira.
Në ato universitete që kanë konkurs sërish do zhvillohen konkurse. Maturanti duhet të paraqitet te fakulteti në ditët përkatëse ku bëhet konkursi sipas profilit që kanë zgjedhur. Maturantët e tjerë duhet të presin 27 shtatorin ku do shfaqen në portal renditja e tyre për çdo program studimi”, u shpreh Xhelaj.
Këtë vit, në raundin e parë kanë aplikuar 20.200 maturantë, prej të cilëve 16.000 u regjistruan. Përveç atyre që nuk janë regjistruar, përfshihen edhe 3.000 maturantë që dolën nga provimet e vjeshtës dhe ata të formularit A1Z. Pra një total prej 7.000 maturantësh pritet të garojnë në raundin e dytë.
/vizionplus.tv
