Rreth 12 mijë furra buke, pastiçeri apo biznese të ndryshme në përpunimin e brumit po vuajnë mungesën e fuqisë punëtore.
Situata ka arritur deri në ngritjen e shqetësimit nga Shoqata e Bukës, e cila i është drejtuar me një shkresë zyrtare Ministrisë së Ekonomisë me disa kërkesa konkrete.
“Kërkojmë që të subvencionohet paga e bukëbërësit, ose furrxhiut, me pagesa specifike për të lehtësuar pagat e larta që kërkohen në treg për shkak të mungesës së fuqisë punëtore. Gjithashtu kërkojmë trajtimin e ‘bukëbërësit’ si zanat në zhdukje,” shprehet kreu i Shoqatës së Bukës dhe Pastiçerive”, thotë Gëzim Peshkëpia, kryetar i shoqatës së bukës.
Me paga që variojnë nga 700–800 euro për të rinjtë që përfundojnë një shkollë profesionale për bukëbërës, e deri në 1 500 euro për profesionistët, sipas shoqatës këto nivele nuk po arrijnë të mbajnë të konsoliduar punëtorët në këtë sektor.
“Kjo është një prurje dhe një nxitje edhe për profesione të tjera, por zanatet tona janë shumë specifike. Zanati i furrxhiut është i vështirë. Specialistët e mirë në Tiranë numërohen me gishta dhe kanë paga mbi 1.5 milionë lekë”, shton Peshkëpia.
Prej disa vitesh, numri i të rinjve që zgjedhin një shkollë profesionale për bukëpjekës është në rënie. Në vitin 2018–2019 ka pasur 322 nxënës, ndërsa për këtë vit shkollor janë vetëm 86 nxënës në total.
