Banorët e Rrjollit, të cilët prej ditësh protestojnë duke kundërshtuar ndërtimin e një resorti turistik në zonë, kanë zhvilluar një takim me kryebashkiakun e Shkodrës, Benet Beci, por kanë dalë pa asnjë zgjidhje konkrete.
Sipas banorëve, kryebashkiaku ka deklaruar se nuk ka kompetenca për çështjet që lidhen me bregdetin.
“Na priti shumë mirë, por na tha se ka zero kompetenca për këtë territor. Vendimet për bregdetin i merr qeveria. Nuk presim që ai të na japë një përgjigje pozitive për atë që kërkojmë ne”, u shpreh Prek Molla, përfaqësues i banorëve të Rrjollit.
Më tej, Molla theksoi se banorët nuk kanë më shpresa as nga institucionet qendrore.
“Sa i përket ministrive apo kryeministrit, nuk kemi shpresa, sepse kanë pasur kohë të na dëgjojnë dhe nuk e kanë bërë. Ne do të shkojmë deri para ambasadave të Bashkimit Evropian dhe asaj kryesore të Shteteve të Bashkuara të Amerikës”, deklaroi ai.
Sipas tij, banorët do t’u drejtohen përfaqësive ndërkombëtare me thirrjen: “Ose na merrni me vete dhe na çoni në Palestinë, ose na lini të jetojmë në tokat tona”.
“Me këtë parrullë do të shkojmë: na largoni nga këtu ose do vritemi. Duan të na largojnë nga toka jonë. Vetëm te ambasada amerikane dhe ato të huaja kemi shpresë”.
Banorët paralajmërojnë se protestat e tyre do të vijjnë.
Një ditë më parë, ata protestuan para prokurorisë Shkodër. Ata kërkojnë ndalimin e menjëhershëm të punimeve, ndërsa u bëjnë thirrje institucioneve të hetojnë dhe të marrin masa ligjore për këtë çështje.
Projekti, në fjalë parashikon ndërtimin e një kompleksi turistik në një sipërfaqe prej rreth 146 hektarësh në zonën ranore pranë Velipojës.
Sipas dokumentacionit të planit zhvillimor, masterplani përfshin 33 struktura akomoduese dhe shërbimi me 3 deri në 10 kate mbi tokë dhe 1 kat nëntokë, një strukturë hoteli, si edhe disa struktura social-kulturore. Totali i sipërfaqes së ndërtimit mbi tokë parashikohet të jetë mbi 400 mijë metra katrorë.
Sipas përshkrimit të projektit, kompleksi synon të ofrojë funksione të ndryshme turistike dhe shërbime për vizitorët./vizionplus.tv
