Prej disa ditësh është ndërprerë puna në tunelin 1 të rrugës së Arbrit në fshatin Bastar të Tiranës. Shkak për këtë mësohet se është bërë shembja e vazhdueshme në hyrje të tij.
Banorët e zonës thonë se shembja ka nisur që në metrat e para të hapjes së tunelit për qarkullim. Ndërsa tuneli i emergjencës nuk është dëmtuar aspak.
Sa i përket tunelit kryesor, banorët thonë se ka shembje të mëdha në 100 metër gjatësi. Masivi i dheut shemb armaturën e tunelit, duke mos ju lënë mundësinë të avancojnë më tej.
Duhet theksuar se shembje ka patur edhe dyshemeja në hyrje të tunelit. Për shkak të paqëndrueshmërisë, firma ka zhvendosur të gjitha mjetet duke i kaluar në anën tjetër në fshatin Murrize të NjA Xibër në Bashkinë Klos, prej disa ditësh, ndërsa në anën e Tiranës është bllokuar me rrjetë dhe është ndërprerë puna.
