Këshilli i Sigurisë Kombëtare konfirmoi sot qëndrimin e Shqipërisë në mbrojtje të sovranitetit të Ukrainës, duke bërë apel për zgjidhjen e krizës në mënyrë paqësore.

 

Mbledhja zgjati rreth 60 minuta, dhe morën pjesë, kryetarja e Kuvendit, Lindita Nikolla, zv.kryeministri Arben Ahmetaj, ministrat që sipas ligjit janë anëtarë të Këshillit të Sigurisë Kombëtare, kreu i Policisë së Shtetit Gledis Nano, dhe prokurori i Përgjithshëm, Olsian Çela.

 

Kryeministri Edi Rama dhe ministrja e Jashtme, Xhaçka munguan pasi ndodhen në Shtetet e Bashkuara të Amerikës.

 

Këshilli diskutoi rreth zhvillimeve në kufirin Ukrainë – Rusi, si dhe rreth pasojave që mund të sjellë një agresion i mundshëm rus.

 

Meta u fokusua te qytetarët shqiptarë që jetojnë në Ukrainë dhe mundësitë për evakuimin e tyre.

 

“Presidenti Meta theksoi në mënyrë të veçantë domosdoshmërinë e evidentimit dhe mbajtjes së kontakteve me qytetarët shqiptarë me banim të përkohshëm në Ukrainë dhe mundësimin e evakuimit të tyre në rast nevoje, vijimin e reformave në fushën e sigurisë dhe mbrojtjes, forcimin e kapaciteteve kundër sulmeve kibernetike, marrjen e masave për rritjen e sigurisë së infrastrukturës strategjike dhe garantimin e rezervave të shtetit për çdo rast, si dhe ndjekjen me vëmendje maksimale të zhvillimeve në rajonin tonë”, theksohet në njoftimin e Presidencës.

Leave a Reply

Your email address will not be published. Required fields are marked *