Krenaria e sportit të Kosovës, Majlinda Kelmendi shkëlqeu në Kampionatin Evropian që po mbahet në Vrashavë të Polonisë. Xhudistja kosovare më famë botërore fitoi Medaljen e Artë në Evropian, duke mundur rusen, Alesya Kuznetsova.
Xhudistja pejane vazhdon shkëlqimin në ‘tapetet’ evropiane, duke dëshmuar se nuk është rastësisht në majat e sportit botëror. Pas triumfit të Majlinda Kelmendit, është Nora Gjakova xhudistja e radhës që i siguroi Kosovës medalje në Kampionatin Evropian që po mbahet në Varshavë.
Nora fitoi medaljen e bronztë në Kampionatin Evropian. Xhudistja kosovare në luftën për Medalje të Bronztë mundi xhudistën bullgare, Ivelina Ilieva. Gjakova bëri paraqitje më të mirë se bullgarja dhe në fund me meritë iu gëzuan fitores, duke i sjell Kosovës edhe një medalje nga garat ndërkombëtare.
Presidenti i Kosovës, Hashim Thaçi, pas fitores së Medaljes së Artë nga Majlinda Kelmendi shkroi në Facebook se “Majlinda Kelmendi dhe xhudistet kosovare po vazhdojnë t’i sjellin Kosovës lajme të mira dhe momente krenarie. “Me Medaljen e sotme të Artë, ajo shënoi hat-trick në Kampionatin Evropian të Xhudos”, shkruan Thaçi.
Edhe Kryeministri i Kosovës, Isa Mustafa uroi xhudistet kosovare dhe trajnerin Driton Kuka, për suksesin e arritur sot në Kampionatin Evropian në Poloni. “Mbretëresha e xhudos, Majlinda Kelmendi dhe Nora Gjakova i sollën vendit edhe dy trofe. Medalja e Artë e Majlindës dhe Medalja e Bronztë e fituar nga Nora në Kampionatin Evropian në Poloni e rikthyen Kosovën në majat e sportit evropian. Qeveria e Kosovës tashmë e ka siguruar buxhetin dhe projektin për ndërtimin e Palestrës Nacionale të Xhudos në Pejë, e cila do të fillojë të ndërtohet gjatë këtij viti, ku do të stërviten kampionet tona aktuale si dhe brezat e rinj të xhudistëve të Kosovës. Ju lumtë Majlindë, Norë, trajnerë dhe i gjithë ekipi ynë në Poloni”, shkruan Mustafa.
