Presidenti i SHBA-së, Donald Trump, ka zhvilluar një bisedë telefonike me presidentin e Libanit, Joseph Aoun, lidhur me një marrëveshje të mundshme për armëpushim në vend.
Sipas mediave në Liban dhe në botën arabe, përfshirë rrjetin televiziv Al-Araby, Trump i ka bërë të ditur Aoun-it se pritet që brenda orëve në vijim të shpallet një armëpushim në Liban. Kjo deklaratë përkon edhe me raportime të mëparshme të “Haaretz”, sipas të cilave ushtria izraelite është udhëzuar të përgatitet për një armëpushim që mund të hyjë në fuqi nga ora 19:00 e së enjtes.
Presidenti libanez, Joseph Aoun, ka falënderuar Trump-in për përpjekjet e tij për të garantuar paqe dhe stabilitet të qëndrueshëm në Liban. Në një njoftim të presidencës libaneze, thuhet se Aoun ka shprehur dëshirën që këto përpjekje të vazhdojnë për t’i dhënë fund sa më shpejt konfliktit. Nga ana e tij, Trump ka rikonfirmuar mbështetjen për presidentin libanez dhe ka theksuar angazhimin për arritjen e një armëpushimi sa më të shpejtë.
Në të njëjtën kohë, raportohet se Forcat e Mbrojtjes së Izraelit (IDF) kanë nisur përgatitjet për një armëpushim të mundshëm në Liban, i cili mund të hyjë në fuqi rreth orës 19:00, ndërsa disa burime flasin për një afat mes orës 19:00 dhe mesnatës. Komandantët ushtarakë izraelitë janë udhëzuar të përgatisin forcat e dislokuara në jug të Libanit për zbatimin e tij.
Ndërkohë, situata ka shkaktuar reagime politike në rajon. Një deputet i Hezbollahut, Hussein Hajj Hassan, e ka cilësuar si “gabim serioz” vendimin e autoriteteve libaneze për të hyrë në negociata të drejtpërdrejta me Izraelin, duke deklaruar se një hap i tillë nuk i shërben interesave të vendit dhe përbën “dorëzime të panevojshme”.
Nga ana tjetër, edhe kryetari i parlamentit iranian, Mohammad Bagher Ghalibaf, ka deklaruar se një armëpushim në Liban është një çështje me rëndësi të madhe dhe se Teherani po ndjek nga afër zhvillimet, duke theksuar përpjekjet për arritjen e një paqeje të qëndrueshme në të gjitha zonat e konfliktit.
