Ish-deputeti i LSI-së, Luan Rama ka publikuar raportin e Zyrës Europiane të Azilantëve, në të cilin thuhet se Shqipëria renditet si vendi i parë në botë për numrin e azilkërkuesve.
Përmes një postimi në “Facebook”, Rama theksoi se shifrat janë alarmante dhe se dëshmojnë që vendi është përballë një kërcënimi kombëtar. Sipas tij, nëse shpopullimi nuk parandalohet, do të sjellë pasoja katastrofike.
“Shpopullimi – rrezik kombëtar! Shqipëria, vendi i parë në botë për numrin e azilkërkuesve! Sipas Zyrës Europiane të Azilantëve (EASO), Shqipëria zë vendin e parë në botë për numrin e azilkërkuesve, duke lënë pas edhe vënde që janë në luftë si Siria, apo vënde me probleme të mëdha në standardet e lirisë, demokracisë dhe të të drejtave të njeriut si Afganistani, Venezuela, Iraku etj! Shifrat e vitit 2019 nuk kanë nevojë për koment: Shqipëria – 59 aplikime për azil për 10 mijë banorë!Siria – 39 aplikime për 10 mijë banorë! Afganistani – 17 aplikime për 10 mijë banorë! Venezuela – 14 aplikime për 10 mijë banorë! Iraku – 9 aplikime për 10 mijë banorë! Duke iu referuar gjithnjë të njejtit burim, pra Zyrës Europiane të Azilantëve (EASO), rezulton se në vitin 2019, aplikimet për azil nga Shqipëria ishin 22.9 mijë, me një rritje prej 2% në raport me vitin 2018, çfarë në fakt shënon rikthim në tendencën rritëse të këtij treguesi!”
Mes të tjerash, Luan Rama e cilësoi të pafalshme dhe kriminale heshtjen e qeverisë përballë këtij “kërcënimi kombëtar”.
