Ministri i Jashtëm rus, Sergei Lavrov, deklaroi se presidenti i Rusisë, Vladimir Putin, nuk do të kaohet me Volodymir Zelenskyn deri sa ky i fundit t’i përulet kërkesve të Moskës.
Në një intervistë për NBC News, Lavrov theksoi se presidentit ukrainas i ishin paraqitur “disa parime të nevojshme për paqen”, por kishte thënë “jo për gjithçka”.
“Putin është gati të takohet me Zelenskyn kur axhenda të jetë gati për një samit, dhe kjo axhendë nuk është aspak gati. Kur Presidenti Trump solli… këto çështje në takimin në Uashington, ishte shumë e qartë për të gjithë se ka disa parime që Uashingtoni beson se duhet të pranohen, duke përfshirë mosanëtarësimin në NATO, duke përfshirë diskutimin e çështjeve territoriale, dhe Zelensky tha jo për gjithçka. Ai madje tha jo për anulimin e legjislacionit që ndalon gjuhën ruse. Si mund të takohemi me një person që pretendon të jetë udhëheqës?”, tha Lavrov.
Ai këmbënguli se Moska kishte rënë dakord të bënte kompromise për një numër çështjesh të diskutuara me Donald Trump gjatë takimit të tij me Putinin në Alaska javën e kaluar.
Duke folur më pas, Zelensky akuzoi Rusinë se po bënte “gjithçka” që mundte për të parandaluar një takim midis tij dhe Putinit dhe i bëri thirrje Perëndimit të zbatojë sanksione të reja ndaj Moskës nëse ajo refuzon të përfundojë luftën.
Burime pranë Kremlinit thanë të premten se Putin ende po kërkonte që Ukraina të tërhiqej nga i gjithë rajoni i Donbasit, pavarësisht se Zelensky refuzoi të hiqte dorë nga territori i mbajtur nga Ukraina.
