I dërguari presidencial amerikan Jared Kushner pritet të takohet sot në Izrael me kryeministrin Benjamin Netanyahu, në kuadër të përpjekjeve të Uashingtonit për të çuar përpara planin e Donald Trump për Rripin e Gazës. Takimi vjen një ditë pasi Kushner zhvilloi bisedime në Egjipt me drejtues të Hamasit, ndërsa plani amerikan mbetet i bllokuar për shkak të qëndrimeve të kundërta të palëve.
Në qendër të diskutimeve është çarmatimi i Hamasit dhe tërheqja graduale e forcave izraelite nga Gaza. Hamasi ka deklaruar se pranon udhërrëfyesin amerikan, ndërsa Netanyahu e ka kundërshtuar atë dhe ka këmbëngulur se çdo tërheqje izraelite duhet të paraprihet nga një çarmatim i plotë dhe i verifikueshëm i Hamasit.
Lexo edhe :
Gjatë takimit në Egjipt me drejtuesin politik të Hamasit, Khalil al-Hayya, Kushner kërkoi hapa konkretë dhe të verifikueshëm për çarmatimin e organizatës. Sipas burimeve të cituara nga mediat ndërkombëtare, ai theksoi gjithashtu se Hamasi nuk mund të ketë rol në qeverisjen e ardhshme të Gazës.
Nga ana tjetër, Hamasi u bëri thirrje ndërmjetësuesve dhe të ashtuquajturit “Këshill i Paqes” që të ushtrojnë presion ndaj Izraelit për të pranuar planin amerikan. Organizata kërkon gjithashtu përcaktimin e një afati konkret për zbatimin e marrëveshjes dhe tërheqjen e trupave izraelite.
Përpjekjet diplomatike zhvillohen me pjesëmarrjen e Egjiptit, Katarit dhe Turqisë, të cilat kanë luajtur rol ndërmjetësues në negociatat për Gazën. Kushner është takuar gjithashtu me presidentin egjiptian Abdel Fattah al-Sisi, ndërsa në bisedime marrin pjesë edhe zyrtarë të “Këshillit të Paqes”, të krijuar nga administrata Trump për të mbështetur planin amerikan.
Ndërkohë, situata në Gaza mbetet e brishtë. Izraeli dhe Hamasi vazhdojnë të akuzojnë njëri-tjetrin për shkelje të armëpushimit, ndërsa raportohen viktima dhe të plagosur nga sulmet izraelite në pjesë të ndryshme të territorit. Sipas të dhënave të Ministrisë së Shëndetësisë në Gaza, të cituara nga mediat ndërkombëtare, më shumë se 1,200 palestinezë janë vrarë që nga hyrja në fuqi e armëpushimit në tetor 2025.
/vizionplus.tv
