Komisioni parlamentar i Ligjeve është mbledhur rreth orës 15:00, për të shqyrtuar kandidaturën e Ilir Metës, e vetmja e propozuar deri tani për postin e Presidentit të Republikës.
Sipas nenit 109, pika 2 e rregullores parlamentare, komisioni i Ligjeve shqyrton nëse kandidatët për president i plotësojnë kushtet e përcaktuara në Kushtetutë.
Në fjalën e saj, deputetja e PS Vasilika Hysi ka deklaruar se kandidatura e Metës plotëson kriteret kushtetuese. “Kuvendi i Shqipërisë duhet të vijojë me raundin e katërt me kandidaturën e Metës”, ka thënë Hysi.
Më pas, komisioni i paraqet seancës së Kuvendit raportin përkatës brenda orës 16:00 të ditës së sotme. Ky është dhe afati i përcaktuar nga Konferenca e Kryetarëve kur procedura është e hapur për paraqitjen e kandidaturave të reja.
Pas ezaurimit të tre raundeve të parë, në raundin e katërt parlamenti pritet të votojë kandidaturën e parë të paraqitur deri tani për postin e Kreut të ri të shtetit, atë të Ilir Metës, aktualisht kryetar i Kuvendit. Ai u propozua nga 23 deputetë si kandidatura e maxhorancës, ndërkohë që opozita e cilësoi sot procesin e zgjedhjes së Presidentit “një pazar të pistë”.
Sipas nenit 87 të Kushtetutës, në dy raundet e fundit, të katërt dhe të pestë, Kuvendi e zgjedh Presidentin me shumicë të thjeshtë, 71 vota, ndërsa në tre raundet e parë nevojiten 84 vota.
