Protagonisti i “Mortal Kombat” dhe filmave të tjerë legjendarë ka ndërruar jetë në moshën 75-vjeçare.
Kari Hiroyuki Tagawa, ylli kinematografik edhe në “Memoirs of a Geisha” apo “The Last Emperor”, ka vdekur pas një goditjeje në tru, siç konfirmoi përfaqësuesja e tij, Penny Vizcarra, për “People”.
Aktori aziatik ndërroi jetë të enjten, më 4 dhjetor, pas komplikacioneve që pësoi, në Santa Barbara të Kalifornisë.
Kush ishte Kari Hiroyuki Tagawa?
Kari Hiroyuki Tagawa ishte i njohur për praninë e tij në versionet filmike dhe televizive të “Mortal Kombat”, pas paraqitjes së tij të parë si magjistari i lig i serialit, Shang Tsung, në filmin origjinal të vitit 1995 nga Paul G.S. Anderson.
Aktori lindi në Tokio më 27 shtator 1950. Puna e babait të tij në Ushtrinë Amerikane bëri që familja të zhvendosej në Fort Bragg, Karolina e Veriut, kur ai ishte 5 vjeç. Ai jetoi gjithashtu në Luiziana dhe Teksas përpara se familja e tij të zhvendosej në Kaliforni, ku ai filloi të aktronte në Shkollën e Mesme Duarte.
Kari Hiroyuki Tagawa
Tagawa filloi të mësonte arte marciale në Japoni. Ai vazhdoi sportin ndërsa ndiqte Universitetin e Kalifornisë Jugore përpara se të kthehej në Japoni dhe të studionte me Mjeshtrin Nakayama të Shoqatës së Karatesë Japoneze, raportoi Deadline. Më vonë ai u kthye në Los Angeles, ku mësoi stilin e tij të arteve marciale, Chu Shin, dhe filloi të aktronte.
Ndërsa jepte mësim Chu Shin, regjisori dhe skenaristi Bernardo Bertolucci e zbuloi aktorin dhe e zgjodhi për rolin që e afirmoi në “The Last Emperor”, sipas gruas së tij, Sally. Në moshën 37 vjeç, në vitin 1987, ai mori rolin kryesor, duke luajtur Chang në filmin fitues të çmimit Oscar të Bertoluccit.
Më pas, në vitin 1991, aktori luajti rolin e Heihachi Mishima në “Tekken”, i cili nxori në pah një ekskluzivitet të njohur të videolojërave. Megjithatë, ishte roli i tij në Mortal Kombat të vitit 1995 që çoi në disa nga performancat e tij më të njohura, përfshirë filmin e vitit 1997 Mortal Kombat: Annihilation. Ai e përsëriti rolin dy herë të tjera në serialin web të vitit 2013 Mortal Kombat: Legacy dhe serialin e vitit 2015 Mortal Kombat X: Generations. Më vonë ai e riinterpretoi rolin e tij si Shang Chung në vitin 2019, duke i dhënë zë personazhit në Mortal Kombat 11 dhe ia dha formën e tij fizike lojës së vitit 2023 Mortal Kombat: Onslaught.
Gjatë karrierës së tij të gjatë, ai është shfaqur në mbi 150 filma, seriale televizive dhe videolojëra. Përveç Bertolucci-t, ai ka punuar me regjisorë si Ivan Reitman në Twins (1988), Philip Kaufman në Rising Sun (1993), Tim Burton në Planet of the Apes (2001), Michael Bay në Pearl Harbor (2001) dhe Rob Marshall në Memoirs of a Geisha (2005).
Ai është shfaqur gjithashtu në seriale televizive si “MacGyver”, “Star Trek: The Next Generation” dhe “Miami Vice”. Roli i tij i fundit i madh ishte në televizion, kur luajti Nobusuke Tagomi në serialin e Amazon Prime të vitit 2015, The “Man in the High Castle”.
