Kina ka përshkallëzuar luftën tregtare të nisur nga Presidenti Trump me tarifa pothuajse të trefishuara ndaj të gjitha mallrave amerikane.
84% taksë ka vendosur qeveria e Pekinit në një mbledhje këtë të mërkurë, të cilat do të hyjnë në fuqi menjëherë pas mesnatës.
Vendimi ekonomik vjen pas shpalljes së taksës amerikane prej 104% ndaj mallrave kineze.
Ndërkohë liderët e unionit janë mbledhur në Bruksel, për të votuar një paketë tarifash ndaj SHBA në mënyrë graduale me katër faza. Faza e parë, që hyn në fuqi më 15 prill, përfshin një tarifë shtesë prej 25 % ndaj perimeve, drithërave, duhanit, disa automjeteve dhe elektronikës.
Faza e dytë pritet të hyjë në fuqi në muajin maj dhe dy fazat e tjera në një afat të mëvonshëm.
Kjo do t’i japë kohë zhvillimit të negociatave ndërsa zyrtarët e BE-së kanë deklaruar se opsioni i tyre i preferuar është një marrëveshje tregtare me Uashingtonin që heq barrierat tregtare, e jo që i shton ato.
Në deklaratën e fundit presidenti amerikan Trump u mburr duke thënë se liderët botërorë po i luten atij për të ulur në negociata e për të arritur një marrëveshje që do të shmangte vijimin e taksave të vendosura deri më tani.
“Këto vende po më luten, ata po vdesin për të bërë një marrëveshje. Ju lutem zotëri të bëjmë një marrëveshje. Do të bëjmë çdo gjë”, tha Trump.
Politikat e reja të administratës amerikane që kanë për qëllim ringjalljen e industrinë prodhuese amerikane kanë tronditur tregjet në të gjithë botën duke lënë në pasiguri të thella bizneset dhe qeveritë globale. /vizionplus.tv
