Pas një debati të ashpër në parlament, Boris Johnson ka marrë një goditje të rëndë me 322 vota pro dhe 306 kundër që e ndalojnë një BREXIT pa marrëveshje më 31 tetor.
Amendamenti i miratuar vonon votimin e marrëveshjes së re derisa të hyjë në fuqi një ligj që garanton se vendi nuk do të largohet nga BE pa marrëveshje. Kjo është një garanci që kërkon shumica parlamentare përpara se të votohet marrëveshja e re dhe vjen pas këmbënguljes së vazhdueshme të kreut të ekzekutivit i cili ka premtuar se procesi do të përfundojë në fund të muajit me ose pa marrëveshje.
Tashmë kryeministri Johnson duhet të nisë sërish negociatat me krerët e institucioneve të BE që të bien dakort për një shtyrje të BREXIT. Nëse ligjvënësit britanikë e konifrmojnë brenda 31 tetorit marrëveshjen e re, pasi të hyjë në fuqi ligji që ata kërkojnë dhe nëse parlamenti europian e ratifikon gjithashtu, atëherë Britania e madhe largohet nga unioni sikurse është paracaktuar. Por në një kohë kaq të kufizuar, mundësitë që kjo të arrihet janë të pakta.
Nëse deputetët nuk e miratojnë marrëveshjen e re, atëherë BREXIT do të shtyhet deri në arritjen e një kompromisi. Kryeministri Boris Johnson ka kërkuar që divorci të përfudnojë njëherë e mirë në mënyrë që qeveria të fokusohet në prioritetet e tjera që ka vendi. Ai ka deklaruar në parlament se nuk do të kërkojë shtyrje të procesit por do të kërkojë me ngulm votimin e marrëveshjes javën e ardhshme.
“Le të shkojmë për një marrëveshje që mund ta shërojë këtë vend dhe na lejon të besojmë në veten tonë edhe një herë si një Mbretëri e Bashkuar e hapur, bujare, globale dhe e lire. Duhet të bëhemi bashkë për ti dhënë fund këtij procesi. Marrëveshja e re është vizionare dhe e shkëlqyer. Nuk ka më asnjë arsye për zvarritje. Le t’i japim fund.”
Mijëra njerëz mbushën rrugët e Londrës duke I bërë thirrje deputetëve që ta miratojnë marrëveshjen. Por mesa duket Britanikët duhet të preisn akoma derisa të gjejnë gjuhën e përbashkët ligjvenesit.
