Italia synon të finalizojë deri në fund të vitit 2027 një plan për t’i lejuar vendit të përdorë edhe një herë energjinë bërthamore, e cila u ndalua gati 40 vjet më parë, tha ministri i Energjisë Gilberto Piqueto Fratin në një intervistë të botuar sot nga mediat italiane.
Qeveria e djathtë e kryeministres Giorgia Meloni ka thënë se reaktorët e vegjël modularë dhe reaktorët modularë të avancuar mund të ndihmojnë në dekarbonizimin e industrive më ndotëse të Italisë, duke përfshirë çelikun, qelqin dhe qeramikën.
Termocentralet bërthamore janë ndaluar në Itali pas referendumeve në 1987 dhe 2011, por qeveria tani po planifikon rregullore për të hequr ndalimin përmes përdorimit të teknologjive të reja të energjisë bërthamore.
“Italia është gati t’i kthehet energjisë bërthamore, një opsion vendimtar që nuk do të zëvendësojë burimet e rinovueshme të energjisë, por do t’i plotësojë ato, duke siguruar një përzierje të ekuilibruar dhe të qëndrueshme të energjisë ,” tha Piqueto Fratin, duke shtuar se një projektligj do të dorëzohet për miratim në cabinet brenda dy javëve të ardhshme.
Vitin e kaluar në shtator, Fratin tha se Italia dëshiron të hartojë rregullore që do të lejojnë teknologjitë e reja bërthamore më së voni deri në fillim të vitit 2025 dhe se ai shpreson që parlamenti të jetë në gjendje të miratojë projektligjin këtë vit.
Italia vlerëson se do të kursejë 17 miliardë euro deri në vitin 2050 nga kostoja e dekarbonizimit të ekonomisë së saj nëse energjia bërthamore përbën të paktën 11% të përzierjes së saj të energjisë.
Piqueto Fratin tha se Plani Italian i Energjisë dhe Klimës (PNIEC) vlerëson se kjo përqindje mund të arrijë deri në 22%./vizionplus.tv
