Italia mbeti pa asnjë skuadër në Champions League tashmë, pasi edhe Interi u eliminua nga Atletiko Madrid. Spanjollët kaluan në çerekfinale, pasi ishin më të saktë nga pika e bardhë e penalltive duke qenë se falë fitores 2 me 1 kishin ekuilibruar humbjen në Milano në ndeshjen e parë.
Ndeshje e bukur dhe me shumë emocione në Madrid. Megjithë kërcënimet e skuadrës vendase ishte Interi që kaloi në avantazh në minutën e 33 pas një aksioni model që u finalizua nga Di Marko.
Megjithatë për të ekuilibruar shifrat, skuadrës se Simeones iu deshën vetëm dy minuta për të shënuar falë edhe gabimit të mbrojtjes zikaltër. Pjesa e parë u mbyll 1 me 1, ndërsa e dyta ishte edhe më e bukur, me raste të mira në të dyja portat.
Grizman e Morata nga njëri krah si dhe Turam e Lautaro nga krahu tjetër humbën shanse të shkëlqyera përpara se Atletiko të kalonte në avantazh në minutën e 87 me ane të Depait. Në minutën e 93 Rikelme humbi një rast flagrant që do të kishte evituar shtesat.
Në 30 minutat e shtesave megjjthë përpjekjet e Interit sidomos rezultati nuk ndryshoi më dhe për të përcaktuar ekipin çerekfinalist u deshën penalltitë. Tek spanjollët shënuan Depai, Rikelme dhe Korrea, ndërsa gaboi Saul Nigez. Mirëpo tek Interi gabimet ishin edhe më të mëdha, pasi humbën penalltitë Sancez, Klasen dhe Lautaro Martinez.
Inter del jashtë deri diku në mënyrë surprizë, ndërsa madrilenët ecin më tej. U kualifikua edhe Dortmund që mundi në shtëpi 2 me 0 skuadrën e PSV me golat e Sanço dhe Rojs.
