Ministrja e Ekonomisë, Delina Ibrahimaj, deklaroi se projekti i planifikuar në Zvërnec është ende në fazën e studimit dhe projektimit, ndërsa nuk ekziston ende një projekt final për t’u prezantuar publikisht.
Duke iu përgjigjur shqetësimeve të qytetarëve që kërkojnë anulimin e projektit, Ibrahimaj tha se aktualisht po punohet nga studiues dhe inxhinierë për të vlerësuar ndikimin në mjedis dhe se çdo propozim do të shqyrtohet në përputhje me standardet evropiane.
“Nuk kemi ende një projekt. Janë duke punuar studiues dhe inxhinierë që merren me ndikimin në mjedis. Jemi ende në fazën e një studimi dhe projektimi. Nuk e kemi një projekt final për ta ndarë me publikun. Në momentin që do të na vijë një propozim, ai do të jetë një që do t’i plotësojë të gjitha kushtet mjedisore. Jemi duke punuar edhe në bashkëpunim me BE-në. Është në qëllimet tona që projekti të miratohet, të vazhdojë, në përputhje me të gjitha kushtet dhe standardet e BE-së. Ne kemi një proces të nisur me BE-në, një kalendar detyrash shumë të mirëpërcaktuar, dhe specifikisht legjislacionin për mbrojtjen e mjedisit. Në momentin që do të na vijë një projekt, do të analizohet dhe do të bëhet transparent. Ne duam që një projekt i kësaj përmase financiare të vijë në Shqipëri, jo vetëm për ndikimin në ekonomi, por edhe për imazhin në turizëm. Ne jemi mbështetës të vijimit të projektit.
Për projektin e Zvërnecit dua të bëj të qartë diçka. Arsyeja pse vijnë në Zvërnec është natyra. Pse disa investitorë kanë vendosur të bëjnë një investim të kësaj përmase është sepse është ajo natyrë. Është në interesin tonë të mbrojmë natyrën, por është edhe në interesin e tyre që natyra të mbrohet.”, deklaroi Ibrahimaj .
