Pranimi i mandatit nga ana e tyre ka bërë që të etiketohen si tradhëtare nga krerët e opozitës, por jo vetëm.
Të ftuara në studion e “Vizionit të Pasdites” dy nga deputetet e reja të parlamentit, Edlira Hyseni dhe Majlinda Halili kanë rrëfyer më shumë rreth arsyeve që i shtynë për ta pranuar mandatin si dhe për reagimet e tyre ndaj sulmeve që iu janë bërë.Edlira Hyseni duket se e ka pritur me më shumë sportivitet çdo lloj sulmi, por ajo që e bën deputeten të ndihet keq është mënyra se si e ka pritur familja këtë situatë.
“Realisht asnjëherë nuk je gati për tu përballur me këtë lloj fature, ta themi. Sidomos opinioni, që është një gjë, sidomos në Shqipëri, mentaliteti shqiptar pjesën e opinionit e ka jetuar gjithmonë shumë fort. Mua më ka ndihmuar në këtë drejtim pak jetesa që kam bërë jashtë Shqipërisë, në atë idenë që secili ka opinionet e tij , nuk do iu pëlqesh të gjithëve, shpesh herë do të kritikojnë, prandaj kam bashkëjetuar pak më mirë. Më shumë kam vuajtur faktin e prindërve, familjarëve, që do të kishin mediat kundër në përbaltjen apo komentet e ndryshme ndaj meje.”-tha ndër të tjera Hyseni.
Dy deputetet e reja ndanë eksperiencat e tyre në detyrën e re, por gjithashtu nuk u “kursyen” të ndajnë me publikun detaje nga jeta e tyre personale.
Të pyetura nëse vijojnë të kenë marrëdhënie miqësore me krerët e partive të tyre, ato u shprehën se dikur kanë patur raporte të mira dhe se shpresojnë që në të ardhmen “të sheshohet” cdo gjë.
