Ilir Alimehmeti, kandidati i dytë më i votuar në listën e hapur të PD-së në Tiranë mbeti jashtë Parlamentit, pasi Partia Demokratike arriti të siguronte vetëm 13 mandate në Tiranë, 12 nga lista e mbyllur dhe Jorida Tabaku nga lista e hapur (më e votuara).
Doktor Alimehmeti përmes një mesazhi në Facebook, falenderon të gjithë qytetarët që e votuan dhe e besuan. Ai thekson se rezultati nuk është fundi, por fillimi i një rrugëtimi të gjatë dhe të ndershëm, që do të vazhdojë me të njëjtin përkushtim, pa u ndalur.
Mesazhi i Alimehmetit
Të dashur qytetarë, miq e bashkëluftëtarë të ndershmërisë,
18.125 herë ju i thatë “po” shpresës, ndryshimit dhe të vërtetës.
18.125 zemra besuan se politika mund të jetë ndryshe – më njerëzore, më e drejtë, më pranë qytetarit. Për këtë, ju jam thellësisht mirënjohës.
Kjo fushatë nuk ishte thjesht një sfidë elektorale – ishte një thirrje për ndërgjegje, për bashkim rreth vlerave që na bëjnë njerëz: ndershmëria, puna, dinjiteti.
Çdo votë që hodhët nuk ishte vetëm për një emër, por për një mënyrë të re të të bërit politikë.
Ju faleminderit që qëndruat krah meje, që më dhatë forcë me fjalët, buzëqeshjet dhe besimin tuaj. Faleminderit që më lejuat të jem zëri juaj.
Rezultati nuk është fundi – është fillimi i një rrugëtimi të gjatë dhe të ndershëm, që do të vazhdojë me të njëjtin përkushtim, pa u ndalur.
Me gjithë shpirtin,
Ilir Alimehmeti
