Me emocione të forta dhe zë të dridhur, Arben Pëllumbi i dha lamtumirën babait të tij, Servet Pëllumbi, duke e cilësuar humbjen si një plagë të thellë jo vetëm personale, por edhe familjare.
Në fjalën e tij prekëse, ai theksoi se i ati nuk ishte thjesht një prind, por një figurë udhëheqëse dhe një njeri me vlera të rralla. Sipas tij, Servet Pëllumbi i mësoi familjes rëndësinë e ndershmërisë, përgjegjësisë dhe dashurisë për njëri-tjetrin.
“Është e vështirë të gjesh fjalët kur humbet një baba, një shtyllë të jetës tënde, një figurë që të ka udhëhequr. Babai ynë nuk ishte thjesht prind, ishte njeri i rrallë,” u shpreh Arben Pëllumbi.
Ai renditi mësimet që i ati u ka lënë pas, duke nënvizuar forcën për të qëndruar dinjitozë dhe për të mos u dorëzuar përballë vështirësive. Ndër të tjera, ai shprehu krenarinë për lidhjen e fortë familjare dhe trashëgiminë e vlerave që, sipas tij, do të jetojnë përherë.
Në përfundim, Arben Pëllumbi e cilësoi largimin e të atit si një boshllëk të madh, por njëkohësisht edhe si një “dritë të fortë”, duke iu referuar shembullit të jetës që ai la pas.
